Tuwakul Alallah: Aik Hairat Angez Hikayat Jo Dil Jeet Legi

Insani zindagi mein aksar aise lamhe aate hain jab insaan har taraf se mayoos ho jata hai. Lekin Islam humein sikhata hai ke aisi mushkil ghariyon mein bhi Allah Ta’ala par mukammal bharosa yani Tuwakul Alallah rakha jaye. Yeh sirf aik kalima nahi, balki aik gehra aqeeda hai jo musalman ko har haal mein sabr aur shukr ki taraf ghamzan karta hai. Aaj hum aapke saath aik aisi hi dil ko chhoo lene wali hikayat share karenge jo Tuwakul Alallah ki behtareen misaal hai.

—

Bewa Aurat Ki Azmaish

Aik shahar mein aik bewa aurat rehti thi. Shohar ki wafat ke baad us par musibaton ke pahar toot pade. Bache sath the aur kul jama poonji sirf teen dirham. Usne haalat se muqabla karne ki thani aur bazaar se un teen dirham ka oon khareed laya. Us oon se kuch cheezein bana kar farokht ki to panch dirham wasool paye. Do dirham se khana peena khareeda aur teen dirham ka phir se oon leti aayi. Isi tarah kuch din guzar basar kiya.

—

Aik Achanak Musibat aur Mayoosi

Aik din woh bazaar se khana peena aur oon lekar ghar ko lauti. Oon rakh kar bachon ko khana peena dene lagi ke aik parinda kahin se udta hua aaya aur woh oon utha kar le gaya.

Aurat ke liye apni kul kainat ka yoon lut jana sohan rooh tha. Mustaqbil ki holnakiyon se khofzada aur gham-o-ghusse se pagal si ho kar reh gayi. Uski har umeed khatam ho chuki thi.

—

Hazrat Dawood Ta’i (RA) Se Sawal

Doosre din, woh seedha janab Dawood Ta’i (rahmatullah alaih) ke ghar gayi aur unko apna qissa suna kar aik sawal poocha: “Kya hamara Rab rahmdil hai ya zaalim?”

Janab Dawood Ta’i (rahmatullah alaih) aurat ki dard bhari kahani sun kar pareshani ke alam mein the aur abhi use tasalli de rahe the ke itne mein darwaze par dastak hui.

—

Allah Ki Ghair Mamooli Tadbeer

Jab Dawood Ta’i (rahmatullah alaih) ne ja kar dekha to das ajnabi ashkhass ko khade hue paya. Unse aamad ka maqsad aur maajra poocha to unhone kaha:

• “Hazrat, hum samandar mein safar kar rahe the ke hamari kashti mein aik surakh ho gaya. Paani is tezi se bhar raha tha ke humein hamari maut saaf nazar aa gayi. Musibat ki is ghari mein, hum mein se har shakhs ne ahad kiya ke agar Allah Pak hamari jaan bacha dein to hum mein se har aadmi aik aik hazaar dirham sadqa dega.”
• Unhone mazeed bataya: “Abhi hum yeh dua kar hi rahe the ke aik parinde ne kahin se hamari kashti mein oon ka aik gola la kar phenk diya. Jise hum ne foran surakh mein phansaya, kashti ko paani se khali kiya aur seedhe yahan nazdeek tareen sahil par aa pahunche. Hum kyunke yahan ke liye ajnabi the is liye logon se kisi motabar aadmi ka naam poocha to unhone humein seedha aap ke paas bhej diya hai. Yeh leejiye das hazaar dirham aur hamari taraf se mustahiqeen ko dhoond kar de deejiye ga.”

—

Tuwakul Alallah Ka Inam

Dawood Ta’i (rahmatullah alaih) Allah Rab ul Izzat ki is hikmat par hairan-o-pareshan hote hue das hazaar dirham lekar seedha andar us aurat ke paas gaye. Sare paise use dete hue kaha: “Ab main tum se aik sawal karna chahta hoon ke kya tera Rab rahmdil hai ya zaalim?”

Bewa aurat Dawood Ta’i (rahmatullah alaih) ke chehre ko takti reh gayi… Uski aankhon se ashak jari the… Goya uske jism ka har har hissa, har har baal Rab ke shukr mein dooba ja raha ho.

—

Allah Ki Tadbeer Aur Aapka Bharosa

Yeh hikayat humein sikhate hai ke Allah ki tadbeerein hamari soch se kahin behtar hain. Jab humein lagta hai ke sab kuch khatam ho gaya hai, wahan se Allah ki madad shuru hoti hai. Isliye, Allah ka shukr ada karein aur uski zaat par mukammal bharosa rakhein. Woh kisi ko tanha nahi chhodta.

Agar aap bhi Allah par bharosa aur Tuwakul Alallah rakhte hain to Allah aap ke liye kaafi hai. Kya aapki zindagi mein bhi aise lamhe aaye hain jahan Allah ne ghair mutawaqqa tareeqe se madad ki ho? Share karein!